【潮汕生醃蠔】自家改良日式風味 網絡熱爆食法
潮汕生醃蠔近期真係非常熱爆嘅食法，我最後都忍唔住引誘整咗一次食，食完真係返唔到轉頭，因為個汁同日本生蠔真係非常夾！好食到停唔到口！不過我第一次整時，唔夠材料做正宗潮汕版本，只好就地取材。好似醋就轉用柚子醋、生抽就轉用日式醬油，差在糖未轉用味醂取代咁樣。不過既然蠔都係來自日本，轉用日本材料都可以呀～
以下是所需材料，在文章底部會有詳細介紹。
一盒二刀流都有成20隻蠔，隻隻都好肥美有蠔味～ 兩個人食真係幾多下，好彩個汁好開胃，唔會好漏！如果唔想食太多，可以買吉X島嘅8隻盒裝蠔頂頂癮，細隻D但都好味的。
隨便搵隻大碗或保鮮盒整就可以，冇咩所謂呀。
做法都非常簡單，只要將所有材料拌勻，就整好個汁了！
好肥好白好大隻嘅日本宮城縣生蠔。
盒蠔實在太大盒，後尾要用多隻碗先裝得晒…
將生蠔浸在汁料中，就可以拎去雪半個鐘，真係咁簡單了！
開餐啦～
肥嘟嘟嘅蠔～
其實呢個汁非常百搭，用嚟配拍青瓜都好ok！食幾隻蠔再食幾塊青瓜，即刻冇咁飽滯呀！
另一個推介食法就係做餃子汁啦，如果大家有其他好推介不妨同我哋分享一下！
完整食譜
材料
日本盒裝去殼生蠔 - 10隻
汁料：
蒜頭 - 1-2粒
薑 - 1片
芫茜 - 1札
指天椒 - 1隻 (怕辣可去核)
日本醬油 - 6湯匙 (今次用了日本昆布醬油，不太鹹)
柚子醋 - 3湯匙 (可用白醋或鎮江醋)
花雕酒 - 1湯匙 (可省略)
麻油 - 1茶匙
魚露 - 半茶匙
糖 - 2茶匙
* 一盒二刀流約20隻生蠔，如果成盒都用呢個汁食，做雙份的汁料就可
烹調步驟
先將蒜頭切碎，薑剁成茸，芫茜切碎，指天椒切成圈。
將汁料所有材料拌勻，並且試味。有時間最好先將汁料冷藏，以免生蠔的溫度有太大轉變。
將生蠔放進汁料中，雪30分鐘到入味就可以享用了。
貼士 (一定要睇埋！)
要留意買回來的盒裝生蠔是可以生食
有些盒裝蠔也是即開即食的，但唔放心可用凍滾水沖一沖
如果唔想吃太生，可用熱水拖一拖生蠔至半熟才浸
生蠔未吃時一定要雪住，以免滋生細菌
浸生蠔的汁最好先冷藏，以免生蠔有太大溫差滋生細菌
除了生蠔，這個汁配拍青瓜、餃子、烏冬都好好食，但個汁用唔晒就千祈唔好留隔夜了！
